呢间餐厅嘅特别之处，係每道菜配上一款精选清酒，务求为食客带来新体验，配搭创意十足，亦啱哂爱酒人士
前菜
冲绳水云，即日本发菜，配上酸酸地嘅汁，几开胃。另一款係青瓜配润肠、忌廉芝士，咸咸地几特别
鱼子酱伴潮味豆腐配 作 Impression
海胆蒸豆腐加入乌鱼子、黑鱼子酱。食前先将黑鱼子铺满喺豆腐上面，口感滑熘。配搭嘅呢款清酒係纯米吟酿无加水，原汁原味。饮落果香馥郁，口感清爽易入口
煎酒平目、醉心赤贝配镜山 千秋龙脉 纯米大吟酿
师傅话只有传统高级寿司店才会以煎酒取代酱油。煎酒係由清酒、梅子乾、鲣鱼、味醂等煮成，食前建议先将平贝鱼沾上煎酒约叁秒时间，令平目鱼索一索煎酒会更添鲜味更美味。赤贝厚身又爽脆，食刺身个阵饮返啖带有青苹果香气嘅镜山千秋龙脉，味道相互辉映，令刺身加倍清香鲜甜
蟹肉飞龙头配天之户 吟泉纯米
以硬豆腐、菰菌、竹笋等製成丸子，并加入蟹肉同蟹粉来增添风味。食嘅时候衬埋呢款以常温呈上嘅纯米酒，饮落味道温醇重米香，亦能提升蟹肉丸嘅鲜味
藁草燻鲣鱼配仁井田 自然酒 樽熟成纯米
师傅推荐先食面层嘅日本薑，试下日本薑原味，再连埋燻鲣鱼一齐食。鲣鱼经烟燻后外脆内软，肉质丰油香又鲜甜，味道带点稻草香
里芋牛筋煮配大湖 x Sake Man by E.K.
日本海老芋配上熬煮咗18个小时嘅牛筋，味道香浓又入味，口感软绵，入口即化。呢道菜配搭住自家同大湖清酒合作嘅纯米酒，味道浓厚，非常适合配衬浓味嘅牛筋
和牛香味烧配超王禄 本生•纯米
A4和牛够嫩滑，而且牛肉味浓郁，点少少Wasabi食味道会变甜。配搭嘅呢款清酒原来係超限量，熟成1年先出货。饮落果香丰富、旨味饱满，同和牛係绝配
一汁叁菜配北鹿 生酛 本酿造
选用同一款清酒以叁个温度呈上，配上叁道料理，包括鲍鱼素麵、鲷糯米饭、豚角煮，以及鼈清汤
鲍鱼素麵: 矶煮咗3个小时嘅南非鲍鱼，鲜甜爽弹，冷素麵配上海胆汁，再加入鱼子粉增添鲜味，味道不俗
鲷糯米饭: 竹叶包住蜜柑鲷鱼同糯米饭，蜜柑鲷肉质细緻丰鱼香，糯米饭够绵密，配搭常温酒能增添鲜味
豚角煮: 选用鹿儿岛嘅豚肉，配上口感特别嘅山芋蓉。食个刻来一口热清酒，味道更醇厚，仲带出清酒嘅旨味同香气
鼈清汤: 呢个汤係甲鱼清汤，清清地又鲜甜，暖胃就最啱
水信玄甘味杯配悠久之古梅酒 2003大吟酿仕込
水信玄饼晶莹剔透，口感水润，入口即化，加入芒果汁、juicy提子乾、火龙果、坚果等，能提升味道同口感层次。配搭甜品嘅呢款梅酒，酸甜度适中，容易入口，饮落酒醇清香，回味清爽